कैदीबन्दी स्वरोजगार बन्दै

रोल्पा । रोल्पा कारागारका कैदीबन्दीहरु  विभिन्न अभियोगमा जेल जीवन बिताइरहेका कैदीबन्दीहरुले सीपमूलक तालीमपश्चात् स्वरोजगार बन्न थालेका हुन् ।

उनीहरुको मनोबल बढाउन तथा आयआर्जनमा सहयोग पुर्याउने उद्देश्यले प्रदेश सरकारको सहयोगमा एकमहीने मुढा बनाउने तालीम दिएको थियो । त्यसअघि टोपी बुन्ने तालीम समेत लिइसकेका उनीहरुका लागि ढाका टोपी बुन्ने र मुढा बनाउनका लागि मेशिन औजारसमेत हस्तान्तरण गरिएको थियो ।

सामग्री पाएका उनीहरुमध्ये अधिकांशले आफ्नो कामलाई निरन्तरता दिइरहका छन् भने कतिपय कैदीबन्दीहरु काम नगरी त्यतिकै बसेका छन् । कारागारभित्र सिकेको सीपले कैद भुक्तानपछि पनि जीविकोपार्जनमा मद्दत गर्ने भएकाले आफूले कामलाई निरन्तरता दिएका कैदीबन्दी तुलाधर घर्ती मगरको भनाइ छ ।

मिहिनेत र परिश्रम गरी कारागारभित्र उत्पादन गरेका मुढालगायत विभिन्न सामाग्रीले सोचेजस्तो बजार नपाउँदा कहिलेकाहीँ नैराश्यता बढ्ने गरेको कैदीबन्दी ईश्वर महराले बताउनुभयो । “आफूहरुले उत्पादन गरेको सामग्रीको प्रचारप्रसार हुन नसक्दा बजारीकरणको समस्या भएको हुन सक्छ”, महराले भन्नुभयो ।

जिल्ला कारागार रोल्पामा हाल ६ महिला र ७४ पुरुष गरी ८० जना कैदीबन्दी रहेको इञ्चार्ज ईश्वरीप्रसाद भण्डारीले जानकारी दिनुभयो । बजारको व्यवस्थापन हुन नसक्दा कैदीबन्दीले बनाएका यी विभिन्न सामग्रीहरुले उचित मूल्य पाउन सकेका छैनन् ।

बुटवलबाट संचालित प्रदेश ५ को लोकप्रिय अनलाइन अखबार न्यूज डटकम २०७४ पौष ७ देखि सञ्चालनमा आएको हो ।

प्रतिकृया दिनुहोस