प्रदेश ५ मा समय अगावै पुल निर्माण

पाल्पा । तोकिएको समयमै जिल्लाको तानसेन नगरपालिका ९ र माथागढी गाउँपालिका ३ जोड्न निर्माण गरिएको मोटरेबल पुल सम्पन्न भएको छ ।

मोटरेबल पुलको प्रदेश ५ सरकारका मुख्यमन्त्री शंकर पोखरेलले मंगलबार उद्घाटन गरे । पुल उद्घाटन गर्दै मुख्यमन्त्री पोखरेलले निर्माण व्यवसायीको क्षमता कमजोर रहेको गुनासो आएका बेला समयमा काम गर्ने व्यवसायी पनि भेटिएको बताउनुभयो ।

बाँसटारी झडेवा सडक खण्ड अन्तर्गतको तिनाउ खोलामाथि पक्की पुल निर्माणको समय एक वर्षको भए पनि त्यसको ८ दिनअघि नै सकिएको हो ।

पुलको लम्बाइ ३२ मिटर १२ सेन्टिमिटर र चौडाइ ८ मिटर ४ सेन्टिमिटर रहेको छ । विश्व बैंकको राष्ट्रिय ग्रामीण यातायात सुदृढीकरण कार्यक्रम (एसएनआरटीपी) कार्यक्रमअन्तर्गत प्रदेश ५ सरकारको ६ करोड ६६ लाख १६ हजार रुपैयाँको लगानीमा पुल निर्माण सम्झौता भएको थियो । पूर्वाधार विकास कार्यालयका जिल्ला प्रमुख प्रेम बस्यालले यसको भुक्तानी ६ करोड ५१ लाख ९७ हजार भएको बताउनुभयो ।

जय विष्णु निर्माण सेवामार्फत रसुवा कन्स्ट्रक्सन प्रालि धापासी, काठमाडौंले ठेक्का लिएर पुल निर्माण गरेको हो । निर्माण व्यवसायी अनिल सिलवालले सबै पक्षको सहयोगमा समयमै काम सम्पन्न गरिएको बताए । उनले भने, ‘गत वर्षको असार २३ गते सम्झौता गरेका थियौं,’  ‘हामीले यसलाई अवसरका रूपमा लियौं । छिटो काम गर्न हामीले आन्तरिक व्यवस्थापन गयौं ।’

विभिन्न बाधा अवरोधका बीच पनि दिनरात खटेर काम समयभन्दा छिटो नै सकेका उनले बताए । इन्टिग्रेटेड सिस्टमबाट काम गर्दा सफल भएको उनले बताए । कमजोर भूभाग भएकाले ४८ पायल १४ मिटर जमिनमुनि गाडिएको छ । पुलमा एउटामात्र स्पान प्रयोग गरिएको छ ।

पुलको ०७५ असार २३ गते सम्झौता भएर असोजको ८ गते शिलान्यास भएको हो । प्रदेश ५ का भौतिक पूर्वाधार विकासमन्त्री बैजनाथ यादवले पुलको शिलान्यास गर्नुभएको थियो । उद्घाटनमा आएका मन्त्री चौधरीले प्रदेश ५ अन्य प्रदेशभन्दा धेरै आर्थिक प्रगति गर्ने प्रदेश भएको बताए ।

मन्त्री चौधरीले भन्नुभयो ‘समयअगावै काम सकेर तिनाउको अम्लिहानमा पुल बनेको छ,’ ‘सरकारले काम गर्ने ठेकेदारको सूची बनाउँदै छ । काम नगर्ने ठेकेदारलाई कालोसूचीमा राखेर काम नदिने प्रक्रियामा रहेको छ ।’

प्रतिनिधिसभा सांसद दलबहादुर राना र सोमप्रसाद पाण्डेयले समयमा विकास निर्माणको काम गर्ने निर्माण व्यवसायीलाई हौसला प्रदान गर्ने बताउनुभयो । प्रदेश सांसद नारायण आचार्यले नगद १० हजारसहित निर्माण व्यवसायीलाई सम्मानपत्र दिनुभयो ।

बुटवलबाट संचालित प्रदेश ५ को लोकप्रिय अनलाइन अखबार न्यूज डटकम २०७४ पौष ७ देखि सञ्चालनमा आएको हो ।

प्रतिकृया दिनुहोस